domingo, 9 de febreiro de 2025
saída e chegada en Santa Cruz de Ribadulla (Vedra)
saída e chegada en Santa Cruz de Ribadulla (Vedra)
O Club de Montaña Vértice presenta a novena edición da Carreira por Montaña A Camelia. Unha aventura por paraxes cheas de historia, lendas e patrimonio: o bosque de ribeira do Ulla, as fervenzas do seu afluente, o Pontillón, os riscos de cuarzo nas beiras do lendario desfiladeiro do Gundián, os misterios do Pico Sacro e a súas vistas espectaculares, os xardíns históricos do Pazo de Ortigueira…
Saída ás 8:30 h / 100 prazas
Categorías: absoluta / veteran@ (+40) / equipos
A carreira de 32 km con 3.400 m de desnivel acumulado ofrece tramos onde podes correr con facilidade e áreas técnicas onde cada paso se converte nun reto. Hai un desafío engadido: a auga e o barro predominan no percorrido e engaden atractivo e dureza á proba.
A saída atravesa o paseo das oliveiras do pazo de Ortigueira, unha das estampas máis fermosas de Galicia, para baixar rapidamente cara á beira norte do Ulla. Logo dun par de quilómetros seguindo o río pola súa beira norte, crúzase pola Ponte Ulla para realizar varios tramos esixentes, primeiro ás carballeiras do Cercido e, tras pasar a capela do Gundián e o primeiro avituallamento, polas paredes escarpadas de cuarcita que levan ao Coto do Castro, lugar icónico desta proba. Despois de baixar de novo ao Ulla, afrontaremos unha subida e unha baixada para salvar o desfiladeiro do Gundián, ambas moi técnicas. Toca cruzar de novo á provincia da Coruña e subir á Cruz do Couto, outra zona escarpada de cuarcita.
Un túnel baixo a vía do AVE anticipa baixadas técnicas que nos conducen de novo ao Ulla, para enfiar polo seu afluente, o Pontillón. O regato condúcenos á fervenza do Pontillón e logo, a través dunha canle de muíños, á fervenza de Codeso, aínda máis fermosa, onde se localiza o segundo avituallamento. Desde alí iníciase un tramo rompepernas que nos leva ao Pico Sacro, cumio da proba. Tras o duro ascenso vén unha sucesión de subidas e baixadas, algunhas con barro e outras con pedra, todas elas con certa dificultade.
A ruta conecta entón coa Vía da Prata, que se percorre en dirección contraria. Uns centos de metros despois da capela do Santiaguiño, terceiro avituallamento, separámonos do Camiño de Santiago para ir ascendendo polos montes de Santardao ata A Ramalleira, onde o Trail do Pico conecta co percorrido das outras probas para facer os últimos 3 quilómetros: primeiro, por unha zona arborada e húmida, finalmente polas pistas que levan velozmente á meta, de novo en Santa Cruz de Ribadulla.
Saída ás 8:30 h / 100 prazas
Categorías: absoluta / veteran@ (+40) / equipos
A carreira de 22 km con 2.100 m de desnivel acumulado concentra os tramos máis técnicos e espectaculares do percorrido, co desafío constante da presenza de auga e barro.
A saída atravesa o paseo das oliveiras do pazo de Ortigueira, unha das estampas máis fermosas de Galicia, para baixar rapidamente cara á beira norte do Ulla. Logo dun par de quilómetros seguindo o río pola súa beira norte, crúzase pola Ponte Ulla para realizar varios tramos esixentes, primeiro ás carballeiras do Cercido e, tras pasar a capela do Gundián e o primeiro avituallamento, polas paredes escarpadas de cuarcita que levan ao Coto do Castro, lugar icónico desta proba. Despois de baixar de novo ao Ulla, afrontaremos unha subida e unha baixada para salvar o desfiladeiro do Gundián, ambas moi técnicas. Toca cruzar de novo á provincia da Coruña e subir á Cruz do Couto, outra zona escarpada de cuarcita.
Un túnel baixo a vía do AVE anticipa baixadas técnicas que nos conducen de novo ao Ulla, para enfiar polo seu afluente, o Pontillón. O regato condúcenos á fervenza do Pontillón e logo, a través dunha canle de muíños, á fervenza de Codeso, aínda máis fermosa, onde se localiza o segundo avituallamento. Desde alí enlazamos coa Ramalleira, onde o Trail do Castro enfía os últimos 3 quilómetros: primeiro, por unha zona arborada e húmida, finalmente polas pistas que levan velozmente á meta, de novo en Santa Cruz de Ribadulla.
Saída ás 10:00 h / 100 prazas
Categorías: absoluta / xuvenil
A carreira de 14K con 1060 m de desnivel é un trail rápido, aínda que non está exento de tramos técnicos. É un percorrido divertido, con moita auga e que atravesa lugares de gran beleza.
A saída cruza o paseo das oliveiras do pazo de Ortigueira, unha das estampas máis fermosas de Galicia, para baixar rapidamente cara á beira norte do Ulla. Logo de tres quilómetros seguindo o río pola súa beira norte, súbese cara á Cruz do Couto, unha zona escarpada de paredes de cuarcita nas proximidades do desfiladeiro do Gundián.
Un túnel baixo a vía do AVE anticipa baixadas técnicas que nos conducen de novo ao Ulla, para enfiar polo seu afluente, o Pontillón. O regato condúcenos á espectacular fervenza do Pontillón e logo, a través dunha canle de muíños, á fervenza de Codeso, aínda máis fermosa, onde se localiza o avituallamento desta distancia. Desde alí vólvese cruzar baixo a vía do AVE a través dos míticos “dados”, punto icónico da Camelia que recuperamos este ano no Trail das Fervenzas.
Desde a vía do tren ascéndese á Ramalleira, onde o percorrido únese ao do Trail do Pico e o do Trail da Cruz do Couto para afrontar os últimos 3 quilómetros: primeiro, por unha zona arborada e húmida, finalmente polas pistas que levan velozmente á meta, de novo en Santa Cruz de Ribadulla.
Saída ás 10:00 h / 50 prazas
Categorías: absoluta / sub16
A carreira de 10K con 560 m de desnivel acumulado preséntase como unha proba idónea, por distancia e desnivel, para iniciarse no trail running. É a distancia elixida tamén como proba para a categoría sub16 (cadete/infantil). O percorrido é bastante rápido e sinxelo, aínda que presenta un tramo máis intenso na Cruz do Couto, buscando espertar o interese das persoas participantes na disciplina de carreiras por montaña.
A saída cruza o paseo das oliveiras do pazo de Ortigueira, unha das estampas máis fermosas de Galicia, para baixar rapidamente cara á beira norte do Ulla. Logo de tres quilómetros seguindo o río pola súa beira norte, súbese cara á Cruz do Couto, unha zona escarpada de paredes de cuarcita nas proximidades do desfiladeiro do Gundián, onde se atopa o avituallamento da proba.
Desde alí accédese á Ramalleira, onde o percorrido únese ao do Trail do Pico e o do Trail das Fervenzas para afrontar os últimos 3 quilómetros: primeiro, por unha zona arborada e húmida, finalmente polas pistas que levan velozmente á meta, de novo en Santa Cruz de Ribadulla.
Saída a partir das 12:30 h / 50 prazas
A inscrición é gratuíta e pode realizarse previamente a través da plataforma de inscrición ou no propio día ata media hora antes da celebración das carreiras.
Haberá tres distancias:
Saída ás 9:30 h / 200 prazas
A andaina conta este ano cun percorrido renovado, que incide na ribeira do río Ulla cun percorrido de dificultade media-baixa. Ofrece unha oportunidade única de gozar da natureza e do patrimonio de Vedra, centrado principalmente nos valores patrimoniais e naturais das parroquias de Santa Cruz de Ribadulla e Ponte Ulla.
A saída cruza o paseo das oliveiras do pazo de Ortigueira, unha das estampas máis fermosas de Galicia, para baixar logo cara á beira norte do Ulla, achegándose á área recreativa de Agronovo, onde enlaza coa ruta de San Xoán da Cova (PR-G 36), que se segue parcialmente. O percorrido chega ata a Ponte Ulla, onde se atopa o avituallamento.
Logo de deixar a beira do río, atravesa o monte cara aos lugares elevados da Ramalleira e O Pumariño e desde alí segue os camiños que levan á meta, de novo en Santa Cruz de Ribadulla.
